(تابع) خطاب الرئيس جمال عبدالناصر، بمناسبة عيد العمال في شبرا الخيمة

أما اعترفت ألمانيا بإسرائيل كان لينا رأي في هذا الموضوع - كان لينا رأي بيقول إن ألمانيا الغربية اعترفت بإسرائيل، طيب ما إحنا نعترف بألمانيا الشرقية - همه ضد الاعتراف بألمانيا الشرقية وإحنا ضد الاعتراف بإسرائيل - فإحنا قلنا هذا الكلام في الجامعة العربية - إحنا نقترح قطع العلاقات مع ألمانيا الغربية إحنا كنا عايزين نخطي خطوة فيه خطوة تساوي - وهذه الخطوة هي الاعتراف بألمانيا الشرقية، ولكن في الجامعة العربية طبعاً حصل انقسام وفيه دول قالت إنها مابتعملش تمثيل سياسي مع الدول الشيوعية زي السعودية وانهم يفضلوا قطع العلاقات، وحفظاً على وحدة القرار فضلنا اتخاذ قرار وحدة العلاقات- أما بأقول هذا الكلام للناس إن إحنا اللي طلبنا قطع العلاقات مع ألمانيا الغربية، وأنا الحقيقة مانش برضه هاضم الخطوة اللي قامت بها الجامعة العربية واللي تقررت علشان حسونة يروح ويتفاوض مع وزير خارجية ألمانيا الغربية، يعاملوه هناك ويهاجموه- الجرايد تهاجمه وتهاجم العرب وتقول كلام مهين على الأمة العربية وتقول إن إحنا باعتين حسونة علشان ماسك برنيطة أو طربوشه علشان يأخذ فلوس.

          بيقولوا علينا بنتفاوض مع ألمانيا الغربية علشان نأخذ قروض. إحنا ما بندفعش اللي علينا لألمانيا الغربية مش حانأخذ منهم قروض. إحنا علينا لهم 75 مليون جنيه ما بندفعلهمش أقساط الـ75 مليون جنيه واللي بيقولوا إحنا بنتفاوض معاهم علشان نأخذ 50 مليون جنيه، بأقول لهم يا جماعة إن إحنا ما بتنفاوضش ومش حانتفاوض مع ألمانية الغربية وبأفكرهم إن موقفنا من الأصل كان الاعتراف بألمانيا الشرقية، وكان هو ده العمل الجدي الوحيد اللي ممكن العرب يقوموا به علشان يواجهوا اعتراف ألمانيا الغربية بإسرائيل.

          أمريكا تعمل في كل مكان وكان فيه مساعدات اقتصادية في اليمن ولكن ما كانش فيه المساعدات الاقتصادية انهم يضربوا قنابل بازوكا على مخازن الذخيرة وطلعوا بتوع المساعدات الاقتصادية وضربوا مخازن الذخيرة وطلعت الكلاب البوليسية وراحت مسكت الأمريكان وحصلت الأزمة اللي بين أمريكا واليمن واتهددت اليمن ووقفت الحكومة اليمنية موقف مشرف، وقف الرئيس عبد الله السلال موقف ثوري.

          كما تلتحم القوى المضادة لابد أن قوى الثورة تلتحم، وأنا أرى أن قوى الثورة تلتحم، قوى الثورة في مصر مع قوى الثورة في اليمن.

          أتكلم بعد كده على الجنوب العربي، الجنوب العربي في ثورة في الجنوب العربي، وفي ثوار في الجنوب العربي، وشفتم انتم في التليفزيون أفلام عن شعب الجنوب العربي المكافح المناضل وبشبابه وبنسائه وبرجاله طالعين تصد رصاص الإنجليز وبنادق الإنجليز وحراب الإنجليز، ومش هاممهم وبينضرب عليهم قنابل وبينضرب عليهم رصاص وقدروا يقفوا وقدروا يتصدوا للجيش الإنجليزي.

          من الأول أنا قلت للإنجليز وجم هنا نواب من حزب العمال ومنهم وزير الدفاع الحالي في إنجلترا. قلت لهم يا جماعة الطريقة اللي كانوا ماشيين بها المحافظين لا يمكن إنها تمشي وإن عملية إقامة حكم عميل، إنكم تخرجوا وترتبوا حكومة عميلة علشان تبقوا موجودين على طريقة الاستعمار الجديد مش ممكن. خطة

<21>