(تابع) خطاب الرئيس جمال عبدالناصر، في اجتماع دعا إليه الاتحاد العام للعمال

          ولهذا إحنا بنقول إذابة الفوارق بين الطبقات. إذابة الفوارق بين الطبقات بيتخلله فعلاً مفهوم الحرية، مفهوم حقيقي. أما أن نقول إن فيه حرية ونقول إن التعليم مجاناً وماحدش، مفيش مدارس علشان الناس تدخل فيها بيبقى واجهة زائفة، واجهة غير حقيقية.

          إيه مفهوم الحرية في الثورة الاشتراكية؟ إيه مفهوم الحرية في الديمقراطية الاشتراكية؟. ده كلام لازم نفهمه وده كلام لازم نعرفه، ما نرفعش شعارات ما ننساقش وراء شعارات. وكلنا لازم نفتكر إيه اللي كان موجود قبل 15 سنة كان فيه شعارات، ولكن هذه الشعارات لم تكن مطبقة. كان كام عدد العمال، كانت فيه التأمينات الاجتماعية بتاعة العمال، كان فيه التأمين من الفصل التعسفي، كان فيه ده وده وده. كان فيه التعليم، كان فيه إذابة الفوارق بين الطبقات. كان فيه تحالف الإقطاع مع رأس المال. ما هو مضمون الحرية حينما نتكلم عن الحرية. إيه هي الحرية للراجل اللي مش لاقي يأكل والراجل اللي مش يعشي أولاده. مضمون الحرية لهذا الراجل إنه يلاقي يؤكل ولاده ويلاقي يعشي ولاده. دي الحرية الحقيقة، الحرية الاشتراكية والديمقراطية الاشتراكية اللي إحنا بنتكلم عليها، الحرية مش شعارات.

          حينما نردد الشعارات أو حينما نسمع بالشعارات لازم نعرف إيه اللي ورا هذه الشعارات ولازم نعرف إن فيه ثورة مضادة أيضاً موجودة. وطالما فيه ثورة فيه ثورة مضادة. أما بنقول نلغي الاتحاد الاشتراكي، لا طب ما نقول نصلح الاتحاد الاشتراكي. نلغي الاتحاد الاشتراكي يعني ايه؟ نلغي الاتحاد الاشتراكي يعني إيه، يعني نلغي تحالف قوى الشعب العاملة، يعني بقى بعد كده إذا لغينا الاتحاد الاشتراكي حايقوم حزب، يا حزب واحد يا أحزاب متعددة. حايقوم حزب، حايبقى حزب إيه، يا حزب رجعي ويمثل الرجعية، يا حزب يمثل طبقة من الطبقات. وإحنا قلنا حتى كعمال إحنا مش عاوزين حزب عمال ومش عاوزين يبقى فيه ديكتاتورية العمال ولا ديكتاتورية الطبقة العاملة. قلنا كدا واتفقنا على هذا الكلام. حايقوم حزب عمال؟ حايقوم حزب يمثل البلد رجعياً يمثل ديكتاتورية الطبقة العاملة أو حايقوم حزب زي الأحزاب اللي كانت موجودة قبل الثورة وتمثل تحت اسم الديمقراطية الزائفة ديكتاتورية الإقطاع ورأس المال.

          إن شعار حل الاتحاد الاشتراكي شعار وراه نوايا أخرى ووراه نوايا غير سليمة.

          حانقول تعدد الأحزاب وتعدد الأحزاب، كيف نطبق النظام الاشتراكي بتعدد الأحزاب. بعد ما نخلص مرحلة التحويل الاشتراكي نبقى نفكر في هذا الموضوع.

          أنا مرة في مجلس الأمة قلت إن إحنا في مرحلة التحول الاشتراكي، وبنتساءل هل نعمل حزب أو نعمل حزبين أو نعمل أكثر من هذا، في اجتماعات مجلس الوزراء يمكن بعد النكسة. ولكن قلنا إن إحنا عندنا تحالف قوى الشعب العامل في الاتحاد الاشتراكي اللي هو معناه الديمقراطية الكاملة للشعب العامل واللي هو معناه إن

<8>